श्रीहित यमुनाष्टक

॥1॥
ब्रजाधिराज – नन्दनाम्बुदाभ गात्र चंदना-
नुलेप गंध वाहिनीं भवाब्धि बीज दाहिनीम् ।
जगत्त्रये यशस्विनीं लसत्सुधा पयस्विनीं-
भजे कलिन्द नन्दिनीं दुरंत मोह भंजनीम् ॥1॥

॥2॥
रसैकसीम राधिका पदाब्जभक्ति साधिकां
तदंग-राग पिंजर प्रभाति पुंज मंजुलाम् ।
स्वरोचिषाति शोभितां कृतां जनाधिगंजनां-
भजे कलिन्द नन्दिनीं दुरंत मोह भंजनीम् ॥2॥

॥3॥
ब्रजेन्द्र सूनु राधिका हृदि प्रपूर्यमाणयो-
र्महा रसाब्धि पूरयो रिवाति तीव्र वेगतः ।
बहिः समुच्छलन्नव प्रवाह रूपिणीमहं-
भजे कलिन्द नन्दिनीं दुरंत मोह भंजनीम् ॥3॥

॥4॥
विचित्र रत्न बद्ध सत्तटद्वय श्रियोज्जवलां-
विचित्र हंस सारसाद्यनन्त पक्षि संकुलाम् ।
विचित्र मीन मेखलां कृताति दीन पालितां-
भजे कलिन्द नन्दिनीं दुरंत मोह भंजनीम् ॥4॥

॥5॥
वहंतिकां श्रियां हरेर्मुदा कृपा स्वरूपिणीं-
विशुद्ध भक्तिमुज्ज्वलां परे रसात्मिकां विदुः।
सुधा श्रुतित्वलौकिकीं परेश वर्ण रूपिणीं-
भजे कलिन्द नन्दिनीं दुरंत मोह भंजनीम् ॥5॥

॥6॥
सुरेन्द्र वृन्द वन्दितां रसादधिष्ठिते वने-
सदोपलब्ध माधवाद्भुतैक सदृशोन्मदाम्।
अतीव विह्वलामिव च्चलत्तरंग दोर्लतां-
भजे कलिन्द नन्दिनीं दुरंत मोह भंजनीम् ॥6॥

॥7॥
प्रफुल्ल पंकजाननां लसन्नवोत्पलेक्षणां-
रथांगनाम युग्म कस्तनीमुदार हंसिकाम् ।
नितंब चारु रोधसां हरेः प्रियां रसोज्ज्वलां-
भजे कलिन्द नन्दिनीं दुरंत मोह भंजनीम् ॥7॥

॥8॥
समस्त वेद मस्तकैरगम्य वैभवां सदा-
महा मुनीन्द्र नारदादिभिः सदैव भाविताम् ।
अतुल्य पामरैरपि श्रितां पुमर्थ शारदां-
भजे कलिन्द नन्दिनीं दुरंत मोह भंजनीम् ॥8॥

॥9॥
य एतदष्टकं बुध स्त्रिकाल मादृतः पठेत्-
कलिन्द नन्दिनीं हृदा विचिंत्य विश्व वंदिताम् ।
इहैव राधिकापतेः पदाब्ज भक्ति मुत्तमा-
मवाप्य स ध्रुवं भवेत्परत्र तत्प्रियानुगः ॥9॥

Scroll to Top